Genesis 30:1 αςναυ δε `νϫε ραχηλ ϫε `μπεςμιςι `νθος `νιακωβ αςχοϩ `νϫε ραχηλ ὲτεςςωνι ουοϩ πεϫας `νιακωβ ϫε μα ϣηρι νηι `μμον ϯναμου ὰνοκ.
Genesis 30:2 αϥ`μβον δε `νϫε ιακωβ ὲραχηλ πεϫαϥ νας ϫε μη ὰνοκ `τϣεβιω `μ`φνουϯ φη ὲταϥϥοϫ ϯ`μπουταϩ `ντε τενεϫι.
Genesis 30:3 πεϫε ραχηλ δε `νιακωβ ϫε ϩηππε ις ταβωκι βαλλα μαϣενακ ὲϧουν ϩαρος ουοϩ εςὲμιςι ὲϫεν νααλωϫ ουοϩ ειὲμες ϣηρι ὲβολ `μμος.
Genesis 30:4 ουοϩ αςϯ `μβαλλα τεςβωκι ναϥ ευ`ςϩιμι ουοϩ αϥϣεναϥ ὲϧουν ϩαρος `νϫε ιακωβ.
Genesis 30:5 ουοϩ αςερβοκι `νϫε βαλλα `θβωκι `νραχηλ ουοϩ αςμιςι `νουϣηρι `νιακωβ .
Genesis 30:6 ουοϩ πεϫε ραχηλ ϫε ὰ `φνουϯ ϯϩαπ νηι ουοϩ αϥςωτεμ ὲτα`ςμη αϥϯ νηι `νουϣηρι εθβεφαι αςϯρεν πεϥραν ϫε δαν.
Genesis 30:7 ουοϩ αςερβοκι ον `νϫε βαλλα `θβωκι `νραχηλ ουοϩ αςμιςι `νουϣηρι `μμαϩ 2. `νιακωβ.
Genesis 30:8 ουοϩ πεϫε ραχηλ ϫε ὰ `φνουϯ ϣοπτ ὲροϥ ουοϩ αιερ`ϣφερι `μμοϣι νεμ ταςωνι ουοϩ αιϫεμϫομ ουοϩ αςϯρεν πεϥραν ϫε νεφθαλιμ.
Genesis 30:9 ὲταςναυ δε `νϫε λια ϫε αςòϩι ὲ`ϣτεμμιςι αςϭι `νζελφα τεςβωκι ουοϩ αςτηις `νιακωβ ευ`ςϩιμι.
Genesis 30:10 αϥϣεναϥ δε ὲϧουν ϩαρος `νϫε ιακωβ ουοϩ αςερβοκι `νϫε ζελφα `θβωκι `νλια ουοϩ αςμες ουϣηρι `νιακωβ.
Genesis 30:11 ουοϩ πεϫε λια ϧεν ουϯμαϯ ουοϩ αςϯρεν πεϥραν ϫε γαδ.
Genesis 30:12 ουοϩ αςερβοκι ον `νϫε ζελφα `θβωκι `νλια ουοϩ αςμιςι ὲτι `νουϣηρι `μμαϩ 2. `νιακωβ .
Genesis 30:13 ουοϩ πεϫε λια ϫε ωουνιατ ὰνοκ ϫε ςεναϯωου `μβαλ νηι `νϫε νιϩιομι ουοϩ αςϯρεν πεϥραν ϫε αςςηρ ϫε ουμεθραμαο.
Genesis 30:14 αϥϣεναϥ `νϫε ρουβην ϧεν νιὲϩοου `ντε `πωςϧ ςουο ουοϩ αϥϫιμι `νϩανϫεμφεϩ `μμανδραγορα ϧεν `τκοι ουοϩ αϥενου `νλια τεϥμαυ πεϫε ραχηλ δε `νλια ϫε μοι νηι ϩο ὲβολ ϧεν νιϫεμφεϩ `ννουτεμ `ντε πεϣηρι .
Genesis 30:15 πεϫε λια δε ϫε κην αν ϫε αρὲωλι `μπαϩαι μη τεραωλι ον `ννικεϫεμφεϩ `ννουτεμ `ντε παϣηρι πεϫε ραχηλ δε ϫε παιρηϯ αν μαρεϥ`νκοτ νεμ ὲ`μπαιὲϫωρϩ `ν`τϣεβιω `ννιϫεμφεϩ `ννουτεμ `ντε παϣηρι .
Genesis 30:16 αϥὶ δε `νϫε ιακωβ ὲ`ϩρηι ϧεν `τκοι `νρουϩι ουοϩ αςὶ `νϫε λια ὲβολ ὲ`ϩραϥ ουοϩ πεϫας ϫε ακνηου ὲϧουν ϩαροι `μφοου αιϯ γαρ `μπεκβεχε `ν`τϣεβιω `ννιϫεμφεϩ `ννουτεμ `ντε παϣηρι ουοϩ αϥ`νκοτ νεμας `μπιὲϫωρϩ ὲτε`μμαυ.
Genesis 30:17 ουοϩ ὰ `φνουϯ ςωτεμ ὲλια ουοϩ αςερβοκι αςμιςι `νουϣηρι `μμαϩ 5. `νιακωβ.
Genesis 30:18 ουοϩ πεϫε λια ϫε ὰ `φνουϯ ϯ `μπαβεχε νηι ὲ`φμα ϫε αιϯ `νταβωκι `μπαϩαι ουοϩ αςϯρεν πεϥραν ϫε ιςαχαρ ϫε `φβεχε.
Genesis 30:19 ουοϩ αςερβωκι ὲτι `νϫε λια αςμιςι `μπιϣηρι `μμαϩ 6 `νιακωβ.
Genesis 30:20 ουοϩ πεϫε λια δε ϫε ὰ `φνουϯ ϯ νηι `νουταιο ὲνανεϥ `ν`ϧρηι ϧεν παιςηου `ντε ϯνου εϥὲμενριτ `νϫε παϩαι αιμιςι γαρ ναϥ ν6 `νϣηρι ουοϩ αςϯρεν πεϥραν ϫε ζαβουλων.
Genesis 30:21 ουοϩ μενενςα ναι αςμιςι `νουϣερι αςϯρεν πεςραν ϫε δινα.
Genesis 30:22 ὰ `φνουϯ δε ερ`φμευι `νραχηλ ουοϩ αϥςωτεμ ὲρος `νϫε `φνουϯ ουοϩ αϥουων `ντεςοϯ.
Genesis 30:23 ουοϩ αςερβοκι αςμιςι `νουϣηρι `νιακωβ πεϫε ραχηλ δε ϫε ὰ `φνουϯ ωλι `μπαϣιπι.
Genesis 30:24 ουοϩ αςϯρεν πεϥραν ϫε ιωςηφ εςϫω `μμος ϫε μαρε `φνουϯ ϯ `μπιϣηρι `μμαϩ 2. νηι .
Genesis 30:25 αςϣωπι δε ὲτα ραχηλ μες ιωςηφ πεϫε ιακωβ `νλαβαν ϫε ουορπτ ϩινα `νταϣενηι ὲπαμα νεμ ὲπακαϩι.
Genesis 30:26 μα ναϩιομι νηι νεμ ναὰλωουὶ νη ὲταιερβωκ νακ εθβητου ϩινα `νταϣενηι `νθοκ γαρ ετςωουν `νϯμετβωκ ὲταιαις νεμακ ϫε ουηρ νε νεκτεβνωουι ὲμαυ νεμηι.
Genesis 30:27 πεϫε λαβαν δε ναϥ ϫε ιςϫε αιϫεμ ου`ϩμοτ `μπεκ`μθο αιϭιϣημ γαρ ὰ `φνουϯ `ςμου ὲροι ϧεν νεκμωιτ ὲϧουν.
Genesis 30:28 φωρϫ `μπεκβεχε νηι ὲβολ `ντατηιϥ νακ .
Genesis 30:29 πεϫε ιακωβ δε ναϥ ϫε `νθοκ ετςωουν `νϯμετβωκ ὲταιαις νεμακ ουοϩ νεκτεβνωουὶ τηρου ευχη νεμηι ουηρ νε.
Genesis 30:30 ϩανκουϫι γαρ νε νη εναυ `ντακ `μπα`μθο ουοϩ αυαιαι αυερουμηϣ ουοϩ ὰ `φνουϯ `ςμου ὲροκ ϧεν παϫινὶ ὲϧουν ϩαροκ ϯνου ϫε αιναθαμιο νηι ϩω `νουηι `ν`θναυ.
Genesis 30:31 πεϫε λαβαν ναϥ ϫε ουπε ϯνατηιϥ νακ πεϫε ιακωβ δε ναϥ ϫε `ννεκϯ `ϩλι νηι ὲϣωπ ακϣανερ παιςαϫι παλιν ειὲμονι `ννεκὲςωου ουοϩ ειὲὰρεϩ ὲρωου.
Genesis 30:32 μαρουςινι `νϫε νεκὲςωου τηρου `μπεκ`μθο `μφοου ουοϩ φωρϫ `μμαυ `νὲςωου νιβεν `νὰουαν ϧεν νιϩιηβ νεμ νιὰουὶὰουαν νεμ νη εθνοϫϧ `ν`ϧρηι ϧεν νιβαεμπι νεμ νιουωβϣ ευὲϣωπι νηι `μβεχε.
Genesis 30:33 ουοϩ εςὲςωτεμ νηι `νϫε ταμεθμηι `ν`ϧρηι ϧεν πιὲϩοου `ντε ραςϯ ϫε παβεχε `μπεκ`μθο νη τηρου ὲτε `νςενοϫϧ αν νεμ νιθοιθοι ϧεν νιβαεμπι νεμ νιὰουὶὰουαν ϧεν νιϩιηβ ευὲϣωπι ευκολπ `ντοτ.
Genesis 30:34 πεϫε λαβαν δε ναϥ ϫε μαρεςϣωπι κατα πεκςαϫι.
Genesis 30:35 ουοϩ αϥφωρϫ ὲβολ ϧεν πιὲϩοου ὲτε`μμαυ `ννιβαρηιτ εθνοϫϧ νεμ νιὰουὶὰουαν νεμ νιβαεμπι τηρου εθνοϫϧ νεμ νιὰουὶὰουαν νεμ νη τηρου ὲτε ουον ουωβϣ `νϧητου νεμ νη τηρου ετοι `νὰουὶὰουαν ϧεν νιϩιηβ ουοϩ αϥτηιτου ὲτοτου `ννεϥϣηρι.
Genesis 30:36 ουοϩ αϥθρουχα `φμωιτ `ν3. `νὲϩοου `μμοϣι ουτωου νεμ ιακωβ ιακωβ δε ναϥὰμονι `ννιὲςωου `ντε λαβαν νη ὲταυςωϫπ.
Genesis 30:37 ὰ ιακωβ δε ϭι ναϥ `νου`ϣβωτ `νϣε `ν`ςτυραξ εϥουετουωτ νεμ ουϣε `νκαρια νεμ ου`πλαταμον ουοϩ αϥκοκου `νϫε ιακωβ `νϩανκηκς ὲουοβϣ εϥουονϩ `νϧητου `νϫε πεθουωτ ναϥουονϩ δε πε ϧεν νι`ϣβοϯ `νϫε πιουωβϣ ὲταϥκοκϥ εϥοι `νὰουὶὰουαν.
Genesis 30:38 ουοϩ αϥχα νι`ϣβοϯ ὲταϥκοκου `ν`ϧρηι ϧεν νιμαν`τςο `ντε νιμωου `ντε νιὲςωου ϩινα αυϣανι `νϫε νιὲςωου ὲςω `νςεϭιϣϣωου ὲνιϣβοϯ `νϫε νιὲςωου.
Genesis 30:39 ουοϩ ναυμιςι `νϫε νιὲςωου `νϩανουον ευοι `νθοιθοι `νουωβϣ νεμ ϩανὰουὶὰουαν νεμ ϩαναουαν `νκερμι ευνοϫϧ.
Genesis 30:40 νηϩιηβ δε αϥφορϫου ὲβολ `νϫε ιακωβ ουοϩ αϥχω `μπε`μθο `ννιὲςωου `νουωιλι εϥοι `νουωβϣ νεμ ὰουὶὰουαν νιβεν ϧεν νιϩιηβ ουοϩ αϥφορϫου ὲβολ ναϥ `νϩανòϩι ουοϩ `μπεϥμοϫτου νεμ νιὲςωου `ντε λαβαν.
Genesis 30:41 αςϣωπι δε ϧεν πιςηου ὲϣαυϭιϣϣωου `νϫε νιὲςωου ουοϩ `νςεερβοκι ὰ ιακωβ χα `ϣβοϯ `μπε`μθο `ννιὲςωου `ν`ϧρηι ϧεν νιμαν`τςο εθρουϭιϣϣωου `νϫε νιὲςωου κατα νι`ϣβοϯ.
Genesis 30:42 ὲϣωπ αυϣανμιςι `νϫε νιὲςωου `μπεϥχαυ `μμαυ αυϣωπι δε `νϫε νιατμηινι `νλαβαν να νιμηινι ϩωου `νιακωβ.
Genesis 30:43 ουοϩ αϥερραμαο `νϫε πιρωμι ὲμαϣω ὲμαϣω ουοϩ ὰ ουμηϣ `ντεβνη ϣωπι ναϥ νεμ ϩανὲϩωου νεμ ϩανβωκ νεμ ϩανβωκι νεμ ϩανϫαμαυλι νεμ ϩανεϩευ.